سناؤں کس طرح ان کو ہے کیسی داستاں میری

سناؤں کس طرح ان کو ہے کیسی داستاں میری

کبھی میری زباں ان کی کبھی ان کی زباں میری

ہمیشہ زندگی زیر و زبر برداشت کرتی ہے

گزرتی جا رہی ہے اس طرح عمر رواں میری

بنایا معتبر انساں کو جس نے سجدہ کرنے پر

میں بے بہرہ رہوں اس سے یہ ہمت ہے کہاں میری

تیری گھٹتی ہوئی شہرت مجھے آگاہ کرتی ہے

کہیں برسوں کی محنت ہو نہ جائے رائیگاں میری

حقیقت میں محبت زندگی کا اک قرینہ ہے

نہ بکھری آج تک زیبائش کون و مکاں میری