sirf ek larzish hai nok-e-Khaar par shabnam ki bund

sirf ik larzish hai nok-e-ḳhār par shabnam kī buuñd

phir bhī is fursat par us kī mujh ko rashk aa jaa.e hai

merī tanhā.ī na pūchho jaise koī naqsh-e-pā

duur sahrā ke kisī goshe meñ paayā jaa.e hai

sañg kyā hai bas sarāpā intizār-e-but-tarāsh

zindagī kā ḳhvāb logo yuuñ bhī dekhā jaa.e hai

shab kā vo pichhlā pahar aur phīkī phīkī chāñdnī

raat bas kar jaise koī haar kumhlā jaa.e hai

raat kī tanhā.iyāñ aur un kī aamad kā ḳhayāl

chāñd jaise ruuh ke andar se guzrā jaa.e hai

is sahī qad kā ḳhirām-e-nāz vo fitna hai jo

har qadam par ik na.e sāñche meñ Dhaltā jaa.e hai

ab ye hāl-e-dil hai jaise rakh ke kāñToñ par 'niyāz'

reshmī chādar ko bedardī se khīñchā jaa.e hai

sirf ek larzish hai nok-e-KHar par shabnam ki bund

phir bhi is fursat par us ki mujh ko rashk aa jae hai

meri tanhai na puchho jaise koi naqsh-e-pa

dur sahra ke kisi goshe mein paya jae hai

sang kya hai bas sarapa intizar-e-but-tarash

zindagi ka KHwab logo yun bhi dekha jae hai

shab ka wo pichhla pahar aur phiki phiki chandni

raat bas kar jaise koi haar kumhla jae hai

raat ki tanhaiyan aur un ki aamad ka KHayal

chand jaise ruh ke andar se guzra jae hai

is sahi qad ka KHiram-e-naz wo fitna hai jo

har qadam par ek nae sanche mein Dhalta jae hai

ab ye haal-e-dil hai jaise rakh ke kanTon par 'niyaz'

reshmi chadar ko bedardi se khincha jae hai