sirf kahne ko koi azmat-nishan banta nahin

sirf kahne ko koī azmat-nishāñ bantā nahīñ

chand qatroñ se to bahr-e-be-karāñ bantā nahīñ

chaar chhe phūloñ se apne ghar kā guldasta sajā

chaar chhe phūloñ se hargiz gulsitāñ bantā nahīñ

kārvāñ kā paas hai tujh ko to paanī par na chal

ye vo jaada hai jahāñ koī nishāñ bantā nahīñ

be-sar-o-sāmāñ parindo kaash tum ye sochte

kaun sī shāḳheñ haiñ jin par āshiyāñ bantā nahīñ

kis qadar nā-qābil-e-idrāk hai merī zabāñ

koī is bastī meñ merā ham-zabāñ bantā nahīñ

sirf kahne ko koi azmat-nishan banta nahin

chand qatron se to bahr-e-be-karan banta nahin

chaar chhe phulon se apne ghar ka guldasta saja

chaar chhe phulon se hargiz gulsitan banta nahin

karwan ka pas hai tujh ko to pani par na chal

ye wo jada hai jahan koi nishan banta nahin

be-sar-o-saman parindo kash tum ye sochte

kaun si shaKHen hain jin par aashiyan banta nahin

kis qadar na-qabil-e-idrak hai meri zaban

koi is basti mein mera ham-zaban banta nahin