sisak lete hain gahe nala-o-zari nahin karte

sisak lete haiñ gaahe nāla-o-zārī nahīñ karte

mohabbat jin ko hotī hai adākārī nahīñ karte

kise batlā.eñ ham kyoñ us kī mahfil meñ nahīñ jaate

huzūrī jin ko hāsil ho vo darbārī nahīñ karte

hunar rakhte ho suune nāḳhunoñ ko kuchh to zīnat do

kabhī kyoñ aa ke mere dil pe gul-kārī nahīñ karte

mirī chāhat ko hañs kar kah diyā dīvāngī tum ne

to phir kyoñ paas aa kar duur bīmārī nahīñ karte

jo dil meñ hai tumhāre saaf vo chehre se zāhir hai

chalo muñh se bhī kah do ziyāda hushyārī nahīñ karte

haiñ kuchh sūkhe hue phūloñ ke bichchhū in kitāboñ meñ

inhī ke ḳhauf se ham saaf almārī nahīñ karte

ye manzar rail kī khiḌkī ke bāhar jo badalte haiñ

guzar jaate haiñ un ko ḳhud pe ham taarī nahīñ karte

ḳhusūsan imtihāñ kī date bhī jab yak-ba-yak aa.e

ajab kyā fail ho jaa.eñ jo tayyārī nahīñ karte

sisak lete hain gahe nala-o-zari nahin karte

mohabbat jin ko hoti hai adakari nahin karte

kise batlaen hum kyon us ki mahfil mein nahin jate

huzuri jin ko hasil ho wo darbari nahin karte

hunar rakhte ho sune naKHunon ko kuchh to zinat do

kabhi kyon aa ke mere dil pe gul-kari nahin karte

meri chahat ko hans kar kah diya diwangi tum ne

to phir kyon pas aa kar dur bimari nahin karte

jo dil mein hai tumhaare saf wo chehre se zahir hai

chalo munh se bhi kah do ziyaada hushyari nahin karte

hain kuchh sukhe hue phulon ke bichchhu in kitabon mein

inhi ke KHauf se hum saf almari nahin karte

ye manzar rail ki khiDki ke bahar jo badalte hain

guzar jate hain un ko KHud pe hum tari nahin karte

KHususan imtihan ki date bhi jab yak-ba-yak aae

ajab kya fail ho jaen jo tayyari nahin karte