siskiyon hichkiyon aahon ki farawani mein

siskiyoñ hichkiyoñ aahoñ kī farāvānī meñ

uljhaneñ kitnī haiñ is ishq kī āsānī meñ

ye tire bāloñ kā tālāb kī tah ko chhūnā

hālat-e-ḳhvāb meñ yā ālam-e-uryānī meñ

be-hijābāna kisī lahr kā tujh tak aana

phir tire jism kā bah jaanā ghane paanī meñ

kahkashāoñ kā ġhazāloñ kā ġhazal-zādoñ kā

dūr-o-nazdīk se aanā tirī mehmānī meñ

raat kā jhuknā tirī pusht pe dildārī ko

baaġh ke peḌoñ kā aa jaanā rajaz-ḳhvānī meñ

bām-o-dar dekhte jaate haiñ khaḌe sakte meñ

ik sitāre kā tavārud tirī peshānī meñ

marmarīñ uñgliyāñ ik dil pe likheñ hāl-e-hinā

phuul āvāz kā khil jaa.e pashemānī meñ

chāñd maḳhrūtī ubhāroñ pe shuā.eñ pheñke

is qadar mahv tujhe dekh ke hairānī meñ

sāya-e-sābit-o-sayyār ke haale meñ chalūñ

aur jahānoñ meñ rahūñ terī nigahbānī meñ

siskiyon hichkiyon aahon ki farawani mein

uljhanen kitni hain is ishq ki aasani mein

ye tere baalon ka talab ki tah ko chhuna

haalat-e-KHwab mein ya aalam-e-uryani mein

be-hijabana kisi lahr ka tujh tak aana

phir tere jism ka bah jaana ghane pani mein

kahkashaon ka ghazalon ka ghazal-zadon ka

dur-o-nazdik se aana teri mehmani mein

raat ka jhukna teri pusht pe dildari ko

bagh ke peDon ka aa jaana rajaz-KHwani mein

baam-o-dar dekhte jate hain khaDe sakte mein

ek sitare ka tawarud teri peshani mein

marmarin ungliyan ek dil pe likhen haal-e-hina

phul aawaz ka khil jae pashemani mein

chand maKHruti ubhaaron pe shuaen phenke

is qadar mahw tujhe dekh ke hairani mein

saya-e-sabit-o-sayyar ke haale mein chalun

aur jahanon mein rahun teri nigahbani mein