ستارہ آنکھ میں دل میں گلاب کیا رکھنا

ستارہ آنکھ میں دل میں گلاب کیا رکھنا

کہ ڈھلتی عمر میں رنگ شباب کیا رکھنا

جو ریگزار بدن میں غبار اڑتا ہو

تو چشم خاک رسیدہ میں خواب کیا رکھنا

سفر نصیب ہی ٹھہرا جو دشت غربت کا

تو پھر گماں میں فریب سحاب کیا رکھنا

جو ڈوب جانا ہے اک دن جزیرۂ دل بھی

تو کوئی نقش سر سطح آب کیا رکھنا

الٹ ہی دینا ہے آخر پیالۂ جاں بھی

ہوا کے دوش پہ طشت حباب کیا رکھنا

بس اتنا یاد ہے اک بھول سی ہوئی تھی کہیں

اب اس سے بڑھ کے دکھوں کا حساب کیا رکھنا