sitare so gae to aasman kaisa lagega

sitāre so ga.e to āsmāñ kaisā lagegā

jahān-e-tīrgī meñ ye jahāñ kaisā lagegā

bichhaḌ ke sāhiloñ se mauj-e-dil kaisī lagegī

bikhar ke āñdhiyoñ meñ bādbāñ kaisā lagegā

Thahar jā.eñgī jab ye kashtiyāñ kaisī lageñgī

guzar jā.egā jab āb-e-ravāñ kaisā lagegā

imārat Dhah chukī hogī jo sāñseñ TūTne se

to phir vo sāya-e-dīvār-e-jāñ kaisā lagegā

utar jā.egā rañg-e-āshiqī jab is ke ḳhuuñ se

to dil begāna-e-sūd-o-ziyāñ kaisā lagegā

qafas kaisā lagegā uḌ ga.e jab gaate panchhī

na hogā jab koī shor o fuġhāñ kaisā lagegā

bikhar jā.eñgī zanjīreñ sabhī zindāniyoñ kī

zavāl-e-naḳhvat-e-nā-mehrbāñ kaisā lagegā

bahut rañgīniyāñ hoñgī agarche rah meñ lekin

musāfir kho gayā to kārvāñ kaisā lagegā

jahāñ tum se bahut pahle pahuñch jā.eñge ham log

na jaane āḳhirī vo ḳhāk-dāñ kaisā lagegā

sitare so gae to aasman kaisa lagega

jahan-e-tirgi mein ye jahan kaisa lagega

bichhaD ke sahilon se mauj-e-dil kaisi lagegi

bikhar ke aandhiyon mein baadban kaisa lagega

Thahar jaengi jab ye kashtiyan kaisi lagengi

guzar jaega jab aab-e-rawan kaisa lagega

imarat Dhah chuki hogi jo sansen TuTne se

to phir wo saya-e-diwar-e-jaan kaisa lagega

utar jaega rang-e-ashiqi jab is ke KHun se

to dil begana-e-sud-o-ziyan kaisa lagega

qafas kaisa lagega uD gae jab gate panchhi

na hoga jab koi shor o fughan kaisa lagega

bikhar jaengi zanjiren sabhi zindaniyon ki

zawal-e-naKHwat-e-na-mehrban kaisa lagega

bahut ranginiyan hongi agarche rah mein lekin

musafir kho gaya to karwan kaisa lagega

jahan tum se bahut pahle pahunch jaenge hum log

na jaane aaKHiri wo KHak-dan kaisa lagega