sitare toD hi lane ko chal raha hun main

sitāre toḌ hī laane ko chal rahā huuñ maiñ

yuuñ hai ki aap ke saa.e meñ Dhal rahā huuñ maiñ

tulū'-e-mehr-e-daraḳhshāñ ho zindagī meñ kabhī

isī ḳhayāl meñ ghar se nikal rahā huuñ maiñ

vo ek baat jo maanī nahīñ hai vālid kī

junūñ meñ shaam se pahle hī Dhal rahā huuñ maiñ

sadaf ke saath jo dekhā to abr ne ye kahā

tumhāre shahr kī jānib hī chal rahā huuñ maiñ

kisī kī samt se bhejī ga.ī haiñ tasvīreñ

baḌe sukūt se tanhā machal rahā huuñ maiñ

vo ek shaḳhs jo merā raqīb lagtā hai

vo aa gayā hai so tevar badal rahā huuñ maiñ

sitare toD hi lane ko chal raha hun main

yun hai ki aap ke sae mein Dhal raha hun main

tulu'-e-mehr-e-daraKHshan ho zindagi mein kabhi

isi KHayal mein ghar se nikal raha hun main

wo ek baat jo mani nahin hai walid ki

junun mein sham se pahle hi Dhal raha hun main

sadaf ke sath jo dekha to abr ne ye kaha

tumhaare shahr ki jaanib hi chal raha hun main

kisi ki samt se bheji gai hain taswiren

baDe sukut se tanha machal raha hun main

wo ek shaKHs jo mera raqib lagta hai

wo aa gaya hai so tewar badal raha hun main