sitare TuT kar kyon gir rahe hain su-e-mai-KHana

sitāre TuuT kar kyoñ gir rahe haiñ sū-e-mai-ḳhāna

ḳhudā ma.alūm kis mai-kash kā chhalkā aaj paimāna

zamāna roz dohrātā hai parvāne kā afsāna

magar sīkhā na koī aaj tak īsār-e-parvāna

bachā gardish se mai-ḳhāne ko ai sāqi-e-mai-ḳhāna

kisī kī chashm-e-tar tak aa chalā hai ḳhushk paimāna

ḳhudārā hashr kā ilzām apne sar na lo dekho

mujhe kahne do tum kyoñ kah rahī ho merā afsāna

bas itnī sī tamanna jān-e-takmīl-e-tamanna hai

vo apne muñh se ye kah deñ vo aaya merā dīvāna

ba-ā.īn-e-haqīqat ḳhūn-e-nāhaq rang laatā hai

utar aa.ī hai har ik sham.a meñ tasvīr-e-parvāna

pareshāñ gul se giryāñ sham.a se larzāñ sitāroñ se

jahāñ se chāho tum tartīb de lo merā afsāna

ba-rang-e-nau abhī ye saarī be-rangī badaltī hai

agar tevar badal kar uTh khaḌā ho ek dīvāna

'shifā' husn-e-samā.at ho to kuchh mushkil nahīñ sunñā

na kahne par bhī saarā raaz kah jaatā hai dīvāna

sitare TuT kar kyon gir rahe hain su-e-mai-KHana

KHuda malum kis mai-kash ka chhalka aaj paimana

zamana roz dohraata hai parwane ka afsana

magar sikha na koi aaj tak isar-e-parwana

bacha gardish se mai-KHane ko ai saqi-e-mai-KHana

kisi ki chashm-e-tar tak aa chala hai KHushk paimana

KHudara hashr ka ilzam apne sar na lo dekho

mujhe kahne do tum kyon kah rahi ho mera afsana

bas itni si tamanna jaan-e-takmil-e-tamanna hai

wo apne munh se ye kah den wo aaya mera diwana

ba-ain-e-haqiqat KHun-e-nahaq rang lata hai

utar aai hai har ek shama mein taswir-e-parwana

pareshan gul se giryan shama se larzan sitaron se

jahan se chaho tum tartib de lo mera afsana

ba-rang-e-nau abhi ye sari be-rangi badalti hai

agar tewar badal kar uTh khaDa ho ek diwana

'shifa' husn-e-samaat ho to kuchh mushkil nahin sunna

na kahne par bhi sara raaz kah jata hai diwana