sitaron ke payam aae bahaaron ke salam aae

sitāroñ ke payām aa.e bahāroñ ke salām aa.e

hazāroñ nāma-hā-e-shauq ahl-e-dil ke kaam aa.e

na jaane kitnī nazreñ us dil-e-vahshī pe paḌtī haiñ

har ik ko fikr hai us kī ye shāhīñ zer-e-dām aa.e

isī ummīd meñ betābi-e-jāñ baḌhtī jaatī hai

sukūn-e-dil jahāñ mumkin ho shāyad vo maqām aa.e

hamārī tishnagī bujhtī nahīñ shabnam ke qatroñ se

jise sāqī-garī kī sharm ho ātish-ba-jām aa.e

koī shāyad hamāre dāġh-e-dil kī tarah raushan ho

hazāroñ āftāb is shauq meñ bālā-e-bām aa.e

inheñ rāhoñ meñ shaiḳh-o-muhtasib haa.il rahe aksar

inheñ rāhoñ meñ hūrān-e-bahishtī ke ḳhiyām aa.e

nigāheñ muntazir haiñ ek ḳhurshīd-e-tamannā kī

abhī tak jitne mehr-o-māh aa.e nā-tamām aa.e

ye aalam lazzat-e-taḳhlīq kā hai raqs-e-lāfānī

tasavvur-ḳhāna-e-hairat meñ lākhoñ sub.h-o-shām aa.e

koī 'sardār' kab thā is se pahle terī mahfil meñ

bahut ahl-e-suḳhan uTThe bahut ahl-e-kalām aa.e

sitaron ke payam aae bahaaron ke salam aae

hazaron nama-ha-e-shauq ahl-e-dil ke kaam aae

na jaane kitni nazren us dil-e-wahshi pe paDti hain

har ek ko fikr hai us ki ye shahin zer-e-dam aae

isi ummid mein betabi-e-jaan baDhti jati hai

sukun-e-dil jahan mumkin ho shayad wo maqam aae

hamari tishnagi bujhti nahin shabnam ke qatron se

jise saqi-gari ki sharm ho aatish-ba-jam aae

koi shayad hamare dagh-e-dil ki tarah raushan ho

hazaron aaftab is shauq mein baala-e-baam aae

inhen rahon mein shaiKH-o-muhtasib hail rahe aksar

inhen rahon mein huran-e-bahishti ke KHiyam aae

nigahen muntazir hain ek KHurshid-e-tamanna ki

abhi tak jitne mehr-o-mah aae na-tamam aae

ye aalam lazzat-e-taKHliq ka hai raqs-e-lafani

tasawwur-KHana-e-hairat mein lakhon subh-o-sham aae

koi 'sardar' kab tha is se pahle teri mahfil mein

bahut ahl-e-suKHan uTThe bahut ahl-e-kalam aae