sitaron ki jalwa-fishani nahin hai

sitāroñ kī jalva-fishānī nahīñ hai

abhī āsmāñ par javānī nahīñ hai

ye hai us kī raushan tabī'at kā hissa

tabassum ke pīchhe kahānī nahīñ hai

ajal ḳhuub hañstī hai un bastiyoñ par

jahāñ log haiñ zindagānī nahīñ hai

mohabbat ke jām-o-subū toḌ baiThī

siyāsat kī āñkhoñ meñ paanī nahīñ hai

tashakkur kā iz.hār achchhā hai lekin

ye haq hai koī mehrbānī nahīñ hai

ḳhalāoñ meñ parvāz kaise karegā

tirā hausla āsmānī nahīñ hai

mire nukta-chīno zarā yaad rakhnā

luġhat meñ mirī be-zabānī nahīñ hai

sahārā le 'zāhid' kī ġhazloñ kā tū bhī

agar shaam koī suhānī nahīñ hai

sitaron ki jalwa-fishani nahin hai

abhi aasman par jawani nahin hai

ye hai us ki raushan tabi'at ka hissa

tabassum ke pichhe kahani nahin hai

ajal KHub hansti hai un bastiyon par

jahan log hain zindagani nahin hai

mohabbat ke jam-o-subu toD baiThi

siyasat ki aankhon mein pani nahin hai

tashakkur ka izhaar achchha hai lekin

ye haq hai koi mehrbani nahin hai

KHalaon mein parwaz kaise karega

tera hausla aasmani nahin hai

mere nukta-chino zara yaad rakhna

lughat mein meri be-zabani nahin hai

sahaara le 'zahid' ki ghazlon ka tu bhi

agar sham koi suhani nahin hai