ستاروں کی جلوہ فشانی نہیں ہے

ستاروں کی جلوہ فشانی نہیں ہے

ابھی آسماں پر جوانی نہیں ہے

یہ ہے اس کی روشن طبیعت کا حصہ

تبسم کے پیچھے کہانی نہیں ہے

اجل خوب ہنستی ہے ان بستیوں پر

جہاں لوگ ہیں زندگانی نہیں ہے

محبت کے جام و سبو توڑ بیٹھی

سیاست کی آنکھوں میں پانی نہیں ہے

تشکر کا اظہار اچھا ہے لیکن

یہ حق ہے کوئی مہربانی نہیں ہے

خلاؤں میں پرواز کیسے کرے گا

ترا حوصلہ آسمانی نہیں ہے

مرے نکتہ چینو ذرا یاد رکھنا

لغت میں مری بے زبانی نہیں ہے

سہارا لے زاہدؔ کی غزلوں کا تو بھی

اگر شام کوئی سہانی نہیں ہے