sitam hai mubtala-e-ishq ho jaana jawan ho kar

sitam hai mubtalā-e-ishq ho jaanā javāñ ho kar

hamāre bāġh-e-hastī meñ bahār aa.ī ḳhizāñ ho kar

javānī kī duā.eñ māñgī jaatī thiiñ laḌakpan meñ

laḌakpan ke maze ab yaad aate haiñ javāñ ho kar

ḳhudā rakkhe dil-e-māyūs meñ ummīd baaqī hai

yahī gul hai jo bū detā hai pāmāl-e-ḳhizāñ ho kar

mujhe shabnam banā rakkhā hai in ḳhurshīd-rūoñ ne

rulāte haiñ nihāñ ho kar miTāte haiñ ayaañ ho kar

hamīñ vo the ki hotī thī basar phūloñ ke ġhunche meñ

hamīñ ab ai falak tinke chuneñ be-āshiyāñ ho kar

dar-e-jānāñ ke aage kab tahayyur baḌhne detā hai

jo aatā hai vo rah jaatā hai sañg-e-āstāñ ho kar

nihāl-e-sham.a meñ kyā ḳhushnumā ik phuul aayā thā

sitam Dhāyā nasīm-e-sub.h ne bād-e-ḳhizāñ ho kar

taqāzā sin kā bhī allāh kyā shai hai ki yūsuf se

zuleḳhā naaz kartī hai na.e sar se javāñ ho kar

'jalīl' āḳhir jo kī hai shā.erī kuchh kaam bhī nikle

kisī but ko musaḳhḳhar kījiye mojiz-bayāñ ho kar

sitam hai mubtala-e-ishq ho jaana jawan ho kar

hamare bagh-e-hasti mein bahaar aai KHizan ho kar

jawani ki duaen mangi jati thin laDakpan mein

laDakpan ke maze ab yaad aate hain jawan ho kar

KHuda rakkhe dil-e-mayus mein ummid baqi hai

yahi gul hai jo bu deta hai pamal-e-KHizan ho kar

mujhe shabnam bana rakkha hai in KHurshid-ruon ne

rulate hain nihan ho kar miTate hain ayan ho kar

hamin wo the ki hoti thi basar phulon ke ghunche mein

hamin ab ai falak tinke chunen be-ashiyan ho kar

dar-e-jaanan ke aage kab tahayyur baDhne deta hai

jo aata hai wo rah jata hai sang-e-astan ho kar

nihaal-e-shama mein kya KHushnuma ek phul aaya tha

sitam Dhaya nasim-e-subh ne baad-e-KHizan ho kar

taqaza sin ka bhi allah kya shai hai ki yusuf se

zuleKHa naz karti hai nae sar se jawan ho kar

'jalil' aaKHir jo ki hai shaeri kuchh kaam bhi nikle

kisi but ko musaKHKHar kijiye mojiz-bayan ho kar