sitam ho jae tamhid-e-karam aisa bhi hota hai

sitam ho jaa.e tamhīd-e-karam aisā bhī hotā hai

mohabbat meñ batā ai zabt-e-ġham aisā bhī hotā hai

bhulā detī haiñ sab ranj o alam hairāniyāñ merī

tirī tamkīn-e-behad kī qasam aisā bhī hotā hai

jafā-e-yār ke shikve na kar ai ranj-e-nākāmī

ummīd o yaas donoñ hoñ baham aisā bhī hotā hai

mire pās-e-vafā kī bad-gumānī hai ba-jā tum se

kahīñ be-vaj.h iz.hār-e-karam aisā bhī hotā hai

tirī dildāriyoñ se sūrat-e-begānagī niklī

ḳhushī aisī bhī hotī hai alam aisā bhī hotā hai

vaqār-e-sabr khoyā girya-hā-e-be-qarārī ne

kahīñ ai e'tibār-e-chashm-e-nam aisā bhī hotā hai

ba-dāvā-e-vafā kyuuñ shikva-sanj-e-jaur hai 'hasrat'

dayār-e-shauq meñ ai mahv-e-ġham aisā bhī hotā hai

sitam ho jae tamhid-e-karam aisa bhi hota hai

mohabbat mein bata ai zabt-e-gham aisa bhi hota hai

bhula deti hain sab ranj o alam hairaniyan meri

teri tamkin-e-behad ki qasam aisa bhi hota hai

jafa-e-yar ke shikwe na kar ai ranj-e-nakaami

ummid o yas donon hon baham aisa bhi hota hai

mere pas-e-wafa ki bad-gumani hai ba-ja tum se

kahin be-wajh izhaar-e-karam aisa bhi hota hai

teri dildariyon se surat-e-beganagi nikli

KHushi aisi bhi hoti hai alam aisa bhi hota hai

waqar-e-sabr khoya girya-ha-e-be-qarari ne

kahin ai e'tibar-e-chashm-e-nam aisa bhi hota hai

ba-dawa-e-wafa kyun shikwa-sanj-e-jaur hai 'hasrat'

dayar-e-shauq mein ai mahw-e-gham aisa bhi hota hai