sitam ka hath na roka magar bura to kaha

sitam kā haath na rokā magar burā to kahā

jo zer-e-lab sabhī kahte the barmalā to kahā

tamām-shahr thā munkir tire ta.alluq se

ġharīb-e-shahr tujhe ham ne āshnā to kahā

pighal rahī hai taġhāful kī barf ab shāyad

ki muskurā ke mujhe yaar bevafā to kahā

vafā kā qaht hai itnā ki ab sar-e-maqtal

maiñ is pe ḳhush huuñ ki yāroñ ne marhabā to kahā

hoī na sīna-sipar go himāyat-e-haq meñ

jo misl-e-teġh thā vo harf-e-haq-numā to kahā

sitam ka hath na roka magar bura to kaha

jo zer-e-lab sabhi kahte the barmala to kaha

tamam-shahr tha munkir tere talluq se

gharib-e-shahr tujhe hum ne aashna to kaha

pighal rahi hai taghaful ki barf ab shayad

ki muskura ke mujhe yar bewafa to kaha

wafa ka qaht hai itna ki ab sar-e-maqtal

main is pe KHush hun ki yaron ne marhaba to kaha

hoi na sina-sipar go himayat-e-haq mein

jo misl-e-tegh tha wo harf-e-haq-numa to kaha