sitam ke war se zanjir surKH hone lagi

sitam ke vaar se zanjīr surḳh hone lagī

shikast-e-zīst kī tasvīr surḳh hone lagī

mire badan kā lahū bhī to is meñ shāmil hai

jalā charāġh to tanvīr surḳh hone lagī

koī bhī zaḳhm mire jism par nahīñ lekin

pasīna Tapkā to tahrīr surḳh hone lagī

hamāre baḳht kā sūraj ġhurūb hone se

har ek qaum kī taqdīr surḳh hone lagī

jo ik zamāne se dīvār par hai laTkī huī

na jaane kaise vo shamshīr surḳh hone lagī

har ek aañkh meñ kyā ḳhuuñ agar gayā 'ātish'

ki muñh se niklī to taqrīb surḳh hone lagī

sitam ke war se zanjir surKH hone lagi

shikast-e-zist ki taswir surKH hone lagi

mere badan ka lahu bhi to is mein shamil hai

jala charagh to tanwir surKH hone lagi

koi bhi zaKHm mere jism par nahin lekin

pasina Tapka to tahrir surKH hone lagi

hamare baKHt ka suraj ghurub hone se

har ek qaum ki taqdir surKH hone lagi

jo ek zamane se diwar par hai laTki hui

na jaane kaise wo shamshir surKH hone lagi

har ek aankh mein kya KHun agar gaya 'atish'

ki munh se nikli to taqrib surKH hone lagi