ستم کی آرزو اے بد گماں باقی نہ رہ جائے

ستم کی آرزو اے بد گماں باقی نہ رہ جائے

کوئی اہل وفا کا امتحاں باقی نہ رہ جائے

بہ طرز نو سنایا بارہا افسانۂ ہستی

کہ غم کا کوئی انداز بیاں باقی نہ رہ جائے

جہاں تک ہو سکے تجھ سے ہر اک لے میں پکار ان کو

دل محزوں کوئی طرز فغاں باقی نہ رہ جائے

ہر اک منصور کا دار و رسن سے سامنا ہوگا

غرض یہ ہے کہ کوئی راز داں باقی نہ رہ جائے

نہ ہو انجام میرا جو ہوا فرہاد و مجنوں کا

مٹاؤ اس طرح نام و نشاں باقی نہ رہ جائے

مشیت بھی مجھے تسلیم ہے تقدیر بھی لیکن

کوئی تدبیر اہل کارواں باقی نہ رہ جائے

کبھی غیروں نے پرکھا تھا اب اپنے آزماتے ہیں

مری ہمت کا کوئی امتحاں باقی نہ رہ جائے

تعجب تو یہ ہے اب باغباں نے دل میں ٹھانی ہے

چمن میں کوئی شاخ آشیاں باقی نہ رہ جائے

شفاؔ ایثار میں پابندیٔ دیر و حرم کیسی

مرے سجدوں میں قید آستاں باقی نہ رہ جائے