sitam ki aarzu ai bad-guman baqi na rah jae

sitam kī aarzū ai bad-gumāñ baaqī na rah jaa.e

koī ahl-e-vafā kā imtihāñ baaqī na rah jaa.e

ba-tarz-e-nau sunāyā bārhā afsāna-e-hastī

ki ġham kā koī andāz-e-bayāñ baaqī na rah jaa.e

jahāñ tak ho sake tujh se har ik lai meñ pukār un ko

dil-e-mahzūñ koī tarz-e-fuġhāñ baaqī na rah jaa.e

har ik mansūr kā dār-o-rasan se sāmnā hogā

ġharaz ye hai ki koī rāzdāñ baaqī na rah jaa.e

na ho anjām merā jo huā farhād-o-majnūñ kā

miTāo is tarah nām-o-nishāñ baaqī na rah jaa.e

mashiyyat bhī mujhe taslīm hai taqdīr bhī lekin

koī tadbīr ahl-e-kārvāñ baaqī na rah jaa.e

kabhī ġhairoñ ne parkhā thā ab apne āzmāte haiñ

mirī himmat kā koī imtihāñ baaqī na rah jaa.e

ta.ajjub to ye hai ab bāġhbāñ ne dil meñ Thānī hai

chaman meñ koī shāḳh-e-āshiyāñ baaqī na rah jaa.e

'shifā' īsār meñ pābandī-e-dair-o-haram kaisī

mire sajdoñ meñ qaid-e-āstāñ baaqī na rah jaa.e

sitam ki aarzu ai bad-guman baqi na rah jae

koi ahl-e-wafa ka imtihan baqi na rah jae

ba-tarz-e-nau sunaya barha afsana-e-hasti

ki gham ka koi andaz-e-bayan baqi na rah jae

jahan tak ho sake tujh se har ek lai mein pukar un ko

dil-e-mahzun koi tarz-e-fughan baqi na rah jae

har ek mansur ka dar-o-rasan se samna hoga

gharaz ye hai ki koi raazdan baqi na rah jae

na ho anjam mera jo hua farhad-o-majnun ka

miTao is tarah nam-o-nishan baqi na rah jae

mashiyyat bhi mujhe taslim hai taqdir bhi lekin

koi tadbir ahl-e-karwan baqi na rah jae

kabhi ghairon ne parkha tha ab apne aazmate hain

meri himmat ka koi imtihan baqi na rah jae

tajjub to ye hai ab baghban ne dil mein Thani hai

chaman mein koi shaKH-e-ashiyan baqi na rah jae

'shifa' isar mein pabandi-e-dair-o-haram kaisi

mere sajdon mein qaid-e-astan baqi na rah jae