sitam ko lutf jafa ko wafa bana na sake

sitam ko lutf jafā ko vafā banā na sake

tumhīñ ne aag lagā.ī tumhīñ bujhā na sake

ham un ko tark-e-ta.alluq pe bhī bhulā na sake

girah havā meñ lagā.ī magar lagā na sake

baḌe maze kī hai donoñ taraf kī majbūrī

koī bulā na sake koī paas aa na sake

ajab ravish hai ajab intizām-e-gulshan hai

koī to ḳhuub hañse koī muskurā na sake

sharāb-e-kaif sharāb-e-ḳhushī sharāb-e-sukūñ

na jaane pī na sake ham ki vo pilā na sake

har iztirāb ko ham ne sukūñ se badlā hai

vo aur hoñge jo tūfāñ ke naaz uThā na sake

hayāt-e-shabnam-o-umr-e-shamīm-e-gul mālūm

vo naqsh ban ki zamāna jise miTā na sake

bahut qarīb se dekhā hai ham ne duniyā ko

ye phuul vo hai kisī ke jo kaam aa na sake

mirī pukār ne bedār kar diyā un ko

taġhayyurāt-e-zamāna jinheñ jagā na sake

maiñ har zabāñ kā bahī-ḳhvāh huuñ 'nihāl' magar

ye chāhtā huuñ ki urdu pe aañch aa na sake

sitam ko lutf jafa ko wafa bana na sake

tumhin ne aag lagai tumhin bujha na sake

hum un ko tark-e-talluq pe bhi bhula na sake

girah hawa mein lagai magar laga na sake

baDe maze ki hai donon taraf ki majburi

koi bula na sake koi pas aa na sake

ajab rawish hai ajab intizam-e-gulshan hai

koi to KHub hanse koi muskura na sake

sharab-e-kaif sharab-e-KHushi sharab-e-sukun

na jaane pi na sake hum ki wo pila na sake

har iztirab ko hum ne sukun se badla hai

wo aur honge jo tufan ke naz uTha na sake

hayat-e-shabnam-o-umr-e-shamim-e-gul malum

wo naqsh ban ki zamana jise miTa na sake

bahut qarib se dekha hai hum ne duniya ko

ye phul wo hai kisi ke jo kaam aa na sake

meri pukar ne bedar kar diya un ko

taghayyuraat-e-zamana jinhen jaga na sake

main har zaban ka bahi-KHwah hun 'nihaal' magar

ye chahta hun ki urdu pe aanch aa na sake