sitam mein tab kam ho to pashemani mein rahti hain

sitam meñ taab kam ho to pashemānī meñ rahtī haiñ

mire ġham se mirī ḳhushiyāñ pareshānī meñ rahtī haiñ

tumhārī shakl in āñkhoñ meñ aa jaatī hai din Dhalte

ye donoñ sīpiyāñ phir raat bhar paanī meñ rahtī haiñ

jo dard-e-zaḳhm baḌhtā hai to lutf-andoz hotā huuñ

mirī sab rāhateñ us kī namak-dānī meñ rahtī haiñ

mire andar ke ġham bāhar bhī zāhir hote rahte haiñ

ye dil kī silvaTeñ haiñ jo ki peshānī meñ rahtī haiñ

azal se hai hamārī āñkhoñ meñ paivast ā.īna

so in meñ jhāñkne vaalī bhī hairānī meñ rahtī haiñ

tumheñ maiñ chuum luuñ chhū luuñ zarā ik sharm hai varna

ye saarī justujueñ hadd-e-imkānī meñ rahtī haiñ

sitam mein tab kam ho to pashemani mein rahti hain

mere gham se meri KHushiyan pareshani mein rahti hain

tumhaari shakl in aankhon mein aa jati hai din Dhalte

ye donon sipiyan phir raat bhar pani mein rahti hain

jo dard-e-zaKHm baDhta hai to lutf-andoz hota hun

meri sab rahaten us ki namak-dani mein rahti hain

mere andar ke gham bahar bhi zahir hote rahte hain

ye dil ki silwaTen hain jo ki peshani mein rahti hain

azal se hai hamari aankhon mein paiwast aaina

so in mein jhankne wali bhi hairani mein rahti hain

tumhein main chum lun chhu lun zara ek sharm hai warna

ye sari justujuen hadd-e-imkani mein rahti hain