sitam par sitam sah rahi hai zamin

sitam par sitam sah rahī hai zamīñ

magar muñh se kab boltī hai zamīñ

mirā aur is kā hai sadiyoñ kā saath

mujhe ḳhuub pahchāntī hai zamīñ

zamāne kī har chiiz badlī magar

vahī āsmāñ hai vahī hai zamīñ

bulātā hai ḳhurshīd āġhosh meñ

ḳhalā meñ magar nāchtī hai zamīñ

humaktā huuñ maiñ chāñd ke vāste

aur apnī taraf khīñchtī hai zamīñ

ḳhalā kī bulandī se jab kī nigāh

baḌī ḳhūbsūrat lagī hai zamīñ

kahīñ dab ga.ī barf ke Dher meñ

kahīñ aag ugalne lagī hai zamīñ

kahīñ jin kā koī Thikāna nahīñ

unheñ bhī jagah de rahī hai zamīñ

churā le na 'tāhir' koī fan kā chor

ye bilkul achhūtī na.ī hai zamīñ

sitam par sitam sah rahi hai zamin

magar munh se kab bolti hai zamin

mera aur is ka hai sadiyon ka sath

mujhe KHub pahchanti hai zamin

zamane ki har chiz badli magar

wahi aasman hai wahi hai zamin

bulata hai KHurshid aaghosh mein

KHala mein magar nachti hai zamin

humakta hun main chand ke waste

aur apni taraf khinchti hai zamin

KHala ki bulandi se jab ki nigah

baDi KHubsurat lagi hai zamin

kahin dab gai barf ke Dher mein

kahin aag ugalne lagi hai zamin

kahin jin ka koi Thikana nahin

unhen bhi jagah de rahi hai zamin

chura le na 'tahir' koi fan ka chor

ye bilkul achhuti nai hai zamin