sitam-rasidon ke jazbaat aazmao nahin

sitam-rasīdoñ ke jazbāt āzmāo nahīñ

jo taar TuuT ga.e un ko gudgudāo nahīñ

maiñ ek barg huuñ aur vo bhī barg-e-pazhmurda

havāo dhīre chalo mujh ko āzmāo nahīñ

hameñ ḳhud apnī mohabbat pe naaz hai yaaro

hamāre chāk-e-garebāñ pe muskurāo nahīñ

paḌe na baad meñ pachhtānā tum ko ai yaaro

girāñ na ho to ḳhulūs is qadar baḌhāo nahīñ

har ek shaḳhs kā apnā mizāj hotā hai

kisī ko dekh ke is tarah muskurāo nahīñ

nahīñ hai dosh kisī kā hue haiñ ḳhud barbād

chalo bhī ḳhatm karo baat ko baḌhāo nahīñ

ye kis ne kah diyā tujh se ye baat jhūTī hai

tire faroġh ko tujh se koī lagāv nahīñ

sitam-rasidon ke jazbaat aazmao nahin

jo tar TuT gae un ko gudgudao nahin

main ek barg hun aur wo bhi barg-e-pazhmurda

hawao dhire chalo mujh ko aazmao nahin

hamein KHud apni mohabbat pe naz hai yaro

hamare chaak-e-gareban pe muskurao nahin

paDe na baad mein pachhtana tum ko ai yaro

giran na ho to KHulus is qadar baDhao nahin

har ek shaKHs ka apna mizaj hota hai

kisi ko dekh ke is tarah muskurao nahin

nahin hai dosh kisi ka hue hain KHud barbaad

chalo bhi KHatm karo baat ko baDhao nahin

ye kis ne kah diya tujh se ye baat jhuTi hai

tere farogh ko tujh se koi lagaw nahin