sitam-shiar zamane pe KHauf tari rakh

sitam-shi.ār zamāne pe ḳhauf taarī rakh

mile tū jab bhī sharīfoñ se inkisārī rakh

tujhe milegā tirā mudda.ā zarūr ik din

magar hai shart musalsal talāsh jaarī rakh

ye terā husn kahīñ hādisa na ban jaa.e

sitam-zarīf zamāne se hoshiyārī rakh

safar pe kab tujhe jaanā paḌe ye kyā mālūm

jo kaam vaqt pe aa.e vahī savārī rakh

tujhe vaqār bachānā hai har tarah apnā

har ek baat kī duniyā se hoshiyārī rakh

unhīñ ke faiz se hal hoñgī mushkileñ saarī

ḳhudā-parast buzurgoñ kī jānkārī rakh

na jiine deñge vatan meñ tire tujhe 'ahmar'

munāfiqoñ ke liye tū bhī zo.am-dārī rakh

sitam-shiar zamane pe KHauf tari rakh

mile tu jab bhi sharifon se inkisari rakh

tujhe milega tera muddaa zarur ek din

magar hai shart musalsal talash jari rakh

ye tera husn kahin hadisa na ban jae

sitam-zarif zamane se hoshiyari rakh

safar pe kab tujhe jaana paDe ye kya malum

jo kaam waqt pe aae wahi sawari rakh

tujhe waqar bachana hai har tarah apna

har ek baat ki duniya se hoshiyari rakh

unhin ke faiz se hal hongi mushkilen sari

KHuda-parast buzurgon ki jaankari rakh

na jine denge watan mein tere tujhe 'ahmar'

munafiqon ke liye tu bhi zoam-dari rakh