sitam usne barson uThaya kiya

sitam us ne barsoñ uThāyā kiyā

magar rasm-e-ulfat nibhāyā kiyā

tire hijr meñ ai mah-e-auj-e-husn

falak mujh ko barsoñ rulāyā kiyā

na aanā thā un ko na aa.e yahāñ

maiñ har-chand un ko bulāyā kiyā

hamārī na us ne sunī ek bhī

adū haal apnā sunāyā kiyā

hameñ vaañ kā jaanā manā hī rahā

adū un ke ghar roz aayā kiyā

shab-e-vasl vo mahv-e-zīnat rahe

maiñ ā.īna un ko dikhāyā kiyā

pasījā na dil un kā haa.e ġhazab

maiñ āñkhoñ se dariyā bahāyā kiyā

na maane vo āḳhir chale hī ga.e

bahut un ko 'shaidā' manāyā kiyā

sitam us ne barson uThaya kiya

magar rasm-e-ulfat nibhaya kiya

tere hijr mein ai mah-e-auj-e-husn

falak mujh ko barson rulaya kiya

na aana tha un ko na aae yahan

main har-chand un ko bulaya kiya

hamari na us ne suni ek bhi

adu haal apna sunaya kiya

hamein wan ka jaana mana hi raha

adu un ke ghar roz aaya kiya

shab-e-wasl wo mahw-e-zinat rahe

main aaina un ko dikhaya kiya

pasija na dil un ka hae ghazab

main aankhon se dariya bahaya kiya

na mane wo aaKHir chale hi gae

bahut un ko 'shaida' manaya kiya