ستم وہ اہل محبت پہ ڈھائے جاتے ہیں

ستم وہ اہل محبت پہ ڈھائے جاتے ہیں

گلی سے ان کی جنازے اٹھائے جاتے ہیں

نظر سے میری چھپا کر تجلیاں اپنی

زمانے بھر کو وہ جلوہ دکھائے جاتے ہیں

تمہارے ہجر کے قصے یہ نامہ بر میرے

بروز حشر خدا کو سنائے جاتے ہیں

ہوا یہ حکم کہ عاصی جھکائیں سر اپنا

یہ روز حشر ہے عاشق اٹھائے جاتے ہیں

سما سکے نہ جو دونوں جہان میں یارو

قسم خدا کی وہ دل میں سمائے جاتے ہیں

دکھائی دیتی ہے توحید اب کے خطرے میں

سو تیرے نقش کف پا مٹائے جاتے ہیں

ملیں گے وہ ہمیں جنت میں سوچ کر حیدرؔ

تصورات میں جنت سجائے جاتے ہیں