sitamgaron ke sitam ki uDan kuchh kam hai

sitamgaroñ ke sitam kī uḌaan kuchh kam hai

abhī zamīñ ke liye āsmān kuchh kam hai

jo is ḳhayāl ko bhūle to maare jāoge

ki apnī samt qayāmat kā dhyān kuchh kam hai

hamāre shahr meñ sab ḳhair-o-āfiyat hai magar

yahī kamī hai ki amn-o-amān kuchh kam hai

banā rahā hai falak bhī azaab mere liye

terī zamīn pe kyā imtihān kuchh kam hai

abhī shumār ke qābil haiñ zaḳhm-e-dil mere

abhī vo dushman-e-jāñ mehrbān kuchh kam hai

idhar to dard kā pyāla chhalakne vaalā hai

magar vo kahte haiñ ye dāstān kuchh kam hai

havā-e-vaqt zarā pairahan kī ḳhair manā

ye mat samajh ki parindoñ meñ jaan kuchh kam hai

sitamgaron ke sitam ki uDan kuchh kam hai

abhi zamin ke liye aasman kuchh kam hai

jo is KHayal ko bhule to mare jaoge

ki apni samt qayamat ka dhyan kuchh kam hai

hamare shahr mein sab KHair-o-afiyat hai magar

yahi kami hai ki amn-o-aman kuchh kam hai

bana raha hai falak bhi azab mere liye

teri zamin pe kya imtihan kuchh kam hai

abhi shumar ke qabil hain zaKHm-e-dil mere

abhi wo dushman-e-jaan mehrban kuchh kam hai

idhar to dard ka pyala chhalakne wala hai

magar wo kahte hain ye dastan kuchh kam hai

hawa-e-waqt zara pairahan ki KHair mana

ye mat samajh ki parindon mein jaan kuchh kam hai