sitamgaron se Darun chup rahun nibah karun

sitamgaroñ se Darūñ chup rahūñ nibāh karūñ

ḳhudā vo vaqt na laa.e maiñ ye gunāh karūñ

mirī nazar meñ anā ke sharar salāmat haiñ

inheñ bujhā.ūñ to tāzīm kam-nigāh karūñ

mirī zabāñ ko salīqa nahīñ guzārish kā

maiñ apne haq se ziyāda na koī chaah karūñ

pahāḌ mere tahavvur kā isti.āra hai

maiñ pastiyoñ se bhalā kaise rasm-o-rāh karūñ

masāf-e-zīst meñ mujh ko bas āgahī de do

harām hai jo talab phir koī sipāh karūñ

kisī ko ḳhauf-e-salāsil kisī ko hirs-e-karam

maiñ apne haq meñ ḳhudāyā kise gavāh karūñ

sitam to ye hai ki fauj-e-sitam meñ bhī 'anjum'

bas apne log hī dekhūñ jidhar nigāh karūñ

sitamgaron se Darun chup rahun nibah karun

KHuda wo waqt na lae main ye gunah karun

meri nazar mein ana ke sharar salamat hain

inhen bujhaun to tazim kam-nigah karun

meri zaban ko saliqa nahin guzarish ka

main apne haq se ziyaada na koi chah karun

pahaD mere tahawwur ka istiara hai

main pastiyon se bhala kaise rasm-o-rah karun

masaf-e-zist mein mujh ko bas aagahi de do

haram hai jo talab phir koi sipah karun

kisi ko KHauf-e-salasil kisi ko hirs-e-karam

main apne haq mein KHudaya kise gawah karun

sitam to ye hai ki fauj-e-sitam mein bhi 'anjum'

bas apne log hi dekhun jidhar nigah karun