siwae ishq-e-butan aur mujhko kaam nahin

sivā.e ishq-e-butāñ aur mujh ko kaam nahīñ

unhī kā zikr hai lab par ḳhudā kā naam nahīñ

talāsh-e-yār meñ āvāra-vār phirtā huuñ

misāl-e-charḳh mujhe ek dam qiyām nahīñ

raqīb ke liye bhar bhar ke jaam aate haiñ

hamāre vāste piine kā intizām nahīñ

sulūk ġhair se jo hai vo ham se hotā hai

tumhārī bazm meñ tafrīq-e-ḳhās-o-ām nahīñ

hasīn jitne haiñ sab māl-o-zar ke bande haiñ

yahāñ to ishq hai lekin girah meñ daam nahīñ

kisī se roz tasavvur meñ baat hotī hai

qasam ḳhudā kī mujhe hājat-e-payām nahīñ

na kar visāl meñ un se gila dil-e-nādāñ

ḳhushī kā vaqt hai rone kā ye maqām nahīñ

har ek sher meñ hijrāñ butāñ kā ronā hai

tire kalām meñ 'hājir' ḳhushī kā naam nahīñ

siwae ishq-e-butan aur mujh ko kaam nahin

unhi ka zikr hai lab par KHuda ka nam nahin

talash-e-yar mein aawara-war phirta hun

misal-e-charKH mujhe ek dam qiyam nahin

raqib ke liye bhar bhar ke jam aate hain

hamare waste pine ka intizam nahin

suluk ghair se jo hai wo hum se hota hai

tumhaari bazm mein tafriq-e-KHas-o-am nahin

hasin jitne hain sab mal-o-zar ke bande hain

yahan to ishq hai lekin girah mein dam nahin

kisi se roz tasawwur mein baat hoti hai

qasam KHuda ki mujhe hajat-e-payam nahin

na kar visal mein un se gila dil-e-nadan

KHushi ka waqt hai rone ka ye maqam nahin

har ek sher mein hijran butan ka rona hai

tere kalam mein 'hajir' KHushi ka nam nahin