siyah safha-e-hasti pe main ubhar na saka

siyāh safha-e-hastī pe maiñ ubhar na sakā

mirī shabīh meñ koī bhī rañg bhar na sakā

har ek raah thī masdūd kohsāroñ meñ

bulandiyoñ se kisī tarah maiñ utar na sakā

bure dinoñ kā maiñ ik ḳhaufnāk manzar huuñ

mujhe kabhī bhī koī shaḳhs yaad kar na sakā

nukīle ḳhaar the shīshe the sañg-reze the

rah-e-hayāt se be-dāġh maiñ guzar na sakā

pukārtā rahā mujh ko koī magar 'shāhid'

maiñ mauj-e-bahr thā pal bhar kahīñ Thahar na sakā

siyah safha-e-hasti pe main ubhar na saka

meri shabih mein koi bhi rang bhar na saka

har ek rah thi masdud kohsaron mein

bulandiyon se kisi tarah main utar na saka

bure dinon ka main ek KHaufnak manzar hun

mujhe kabhi bhi koi shaKHs yaad kar na saka

nukile KHar the shishe the sang-reze the

rah-e-hayat se be-dagh main guzar na saka

pukarta raha mujh ko koi magar 'shahid'

main mauj-e-bahr tha pal bhar kahin Thahar na saka