سیاہ شب میں جو روشن دیا سا لگتا تھا

سیاہ شب میں جو روشن دیا سا لگتا تھا

وہ شب چراغ تھا یا روشنی کا ذرہ تھا

حصار جسم سے باہر نکلتے کیسے ہم

بدن میں درد کا دریا کے بعد دریا تھا

وہاں حیات کے صفحات پر نظر پہنچی

درون خاک جہاں جسم جسم بکھرا تھا

وہ بن کے ذات میں اترا دوائے شہرت کل

میرے خلاف قلم نے جو زہر اگلا تھا

اب اس مکان میں تنہائیوں کا ڈیرا ہے

کبھی ہمارے سلف کا بھی اس سے رشتہ تھا

مجھے خبر ہے کہ تنہا نہ تھا سفر میں تو

مرا خیال ترے ساتھ ساتھ چلتا تھا

ہمارے پاس ہی کھوٹا تھا سکۂ اخلاق

دکان دوست میں ورنہ خلوص سستا تھا

اسدؔ کو پڑھ کے یہ سمجھا ہوں میں بقول فگارؔ

وہ شادؔ آج بھی تنہا ہے کل بھی تنہا تھا