siyah shab mein jo raushan diya sa lagta tha

siyāh shab meñ jo raushan diyā sā lagtā thā

vo shab-charāġh thā yā raushnī kā zarra thā

hisār-e-jism se bāhar nikalte kaise ham

badan meñ dard kā dariyā ke baad dariyā thā

vahāñ hayāt ke safhāt par nazar pahuñchī

darūn-e-ḳhāk jahāñ jism jism bikhrā thā

vo ban ke zaat meñ utrā davā-e-shohrat kal

mere ḳhilāf qalam ne jo zahr uglā thā

ab is makān meñ tanhā.iyoñ kā Derā hai

kabhī hamāre salaf kā bhī is se rishta thā

mujhe ḳhabar hai ki tanhā na thā safar meñ tū

mirā ḳhayāl tire saath saath chaltā thā

hamāre paas hī khoTā thā sikka-e-aḳhlāq

dukān-e-dost meñ varna ḳhulūs sastā thā

'asad' ko paḌh ke ye samjhā huuñ maiñ ba-qaul-e-'figār'

vo 'shād' aaj bhī tanhā hai kal bhī tanhā thā

siyah shab mein jo raushan diya sa lagta tha

wo shab-charagh tha ya raushni ka zarra tha

hisar-e-jism se bahar nikalte kaise hum

badan mein dard ka dariya ke baad dariya tha

wahan hayat ke safhat par nazar pahunchi

darun-e-KHak jahan jism jism bikhra tha

wo ban ke zat mein utra dawa-e-shohrat kal

mere KHilaf qalam ne jo zahr ugla tha

ab is makan mein tanhaiyon ka Dera hai

kabhi hamare salaf ka bhi is se rishta tha

mujhe KHabar hai ki tanha na tha safar mein tu

mera KHayal tere sath sath chalta tha

hamare pas hi khoTa tha sikka-e-aKHlaq

dukan-e-dost mein warna KHulus sasta tha

'asad' ko paDh ke ye samjha hun main ba-qaul-e-'figar'

wo 'shad' aaj bhi tanha hai kal bhi tanha tha