siyahi jaise gir jae dam-e-tahrir kaghaz par

siyāhī jaise gir jaa.e dam-e-tahrīr kāġhaz par

likhī kuchh aise hī us ne mirī taqdīr kāġhaz par

ġhazal sun kar musavvir bhī hue hairat-zada saare

banā.ī hū-bahū maiñ ne tirī tasvīr kāġhaz par

agar mahsūs karnā hai utar kar dekh lo dil meñ

nahīñ hotī hai zaḳhmoñ kī kabhī tash.hīr kāġhaz par

qalam kī zarb sadiyoñ tak diloñ ko zaḳhmī kartī hai

na kar taḳhlīq lafzoñ se kabhī shamshīr kāġhaz par

likhā hai ḳhat mujhe us ne magar kaisī ravānī meñ

simaT aa.ī ho jaise ḳhvāb kī tā'bīr kāġhaz par

ġhazal kī chashm-e-nam mujh se ḳhafā ho kar ye kahtī hai

ki maiñ ne kyoñ likhī hai dāstān-e-'mīr' kāġhaz par

mohabbat hī zamāne kī zarūrat hai 'farāz-ārif'

na kar nafrat kī dīvāreñ kabhī tā'mīr kāġhaz par

siyahi jaise gir jae dam-e-tahrir kaghaz par

likhi kuchh aise hi us ne meri taqdir kaghaz par

ghazal sun kar musawwir bhi hue hairat-zada sare

banai hu-bahu main ne teri taswir kaghaz par

agar mahsus karna hai utar kar dekh lo dil mein

nahin hoti hai zaKHmon ki kabhi tashhir kaghaz par

qalam ki zarb sadiyon tak dilon ko zaKHmi karti hai

na kar taKHliq lafzon se kabhi shamshir kaghaz par

likha hai KHat mujhe us ne magar kaisi rawani mein

simaT aai ho jaise KHwab ki ta'bir kaghaz par

ghazal ki chashm-e-nam mujh se KHafa ho kar ye kahti hai

ki main ne kyon likhi hai dastan-e-'mir' kaghaz par

mohabbat hi zamane ki zarurat hai 'faraaz-arif'

na kar nafrat ki diwaren kabhi ta'mir kaghaz par