siyahkar siyah-ru KHata-shiar aaya
siyāhkār siyah-rū ḳhatā-shi.ār aayā
tirī janāb meñ terā gunāhgār aayā
ḳhizāñ kā daur gayā mausam-e-bahār aayā
magar na is dil-e-be-sabr ko qarār aayā
kahīñ javāb na tū ne diyā yahāñ ke sivā
jahāñ meñ yuuñ to bahut maiñ tujhe pukār aayā
sarā-e-dahr meñ chhoḌā tan-e-kasīf apnā
ye bojh sar se musāfir tirā utaar aayā
hamāre nāla-e-dil kā na pūchhiye ahvāl
galī se yaar kī himmat bhī ab ke haar aayā
paḌī jo qais ke uupar nazar bayābāñ meñ
mujhe ġharīb ke uupar ġhazab kā pyaar aayā
na apne paañv se aanā milā galī meñ tirī
yahāñ bhī chaar ke kāñdhoñ pe maiñ savār aayā
ye iztirāb hai kyuuñ hai kidhar kā qasd ai ruuh
kahāñ se aa.ī talab kis jagah se taar aayā
burā ḳhizāñ kā ho dekhe jo sūkhe sūkhe hoñT
ġharīb phuul pe mujh ko ġhazab kā pyaar aayā
mirī na pūchh ki terī galī meñ ḳhaak huuñ maiñ
tujhī ko merī vafā kā na e'tibār aayā
lahad ne khol ke āġhosh dī jagah jo mujhe
lipaT ke rah ga.e ham ko bhī ḳhuub pyaar aayā
yaqīn jaan le saaqī ki ḳhum kī ḳhair nahīñ
ḳhudā na karda jo ab ke mujhe ḳhumār aayā
mire nasīb kahāñ is tarah ke dīda-e-tar
sunūñ ye ḳhush-ḳhabarī kaan se ki yaar aayā
nigah ne un kī jahāñ said-e-nau ko taak liyā
adā ne un kī kahā le nayā shikār aayā
tire firāq ke ḳhūgar na mar miTe jab tak
qazā ke aane kā tab tak na e'tibār aayā
dilā palaT gayā qismat kā pahle hī paasā
ab apnī jiit kahāñ dil jab apnā haar aayā
jab iḳhtiyār chaman par nahīñ to ham ko kyā
hazār baar agar mausam-e-bahār aayā
shikāyat-e-dil-e-muztar kahāñ talak ai maut
duā.eñ dūñgā tujhe gar ise qarār aayā
javāb-e-ḳhat kā na qāsid se mājrā pūchho
hai saaf chehre se zāhir ki sharmsār aayā
nazar meñ phir ga.ī chaal aap kī javānī kī
jo laḌkhaḌātā huā koī bāda-ḳhvār aayā
jo māñgte to hameñ bāġhbāñ se kyā miltā
ġharīb phuul to dāman ko bhī pasār aayā
na apne nāla-e-dil ko milā javāb kahīñ
nikal ke dil se tujhe arsh tak pukār aayā
adam meñ 'shād' ko kyā valvala ho jannat kā
ki ye ġharīb to hastī se dil ko maar aayā
siyahkar siyah-ru KHata-shiar aaya
teri janab mein tera gunahgar aaya
KHizan ka daur gaya mausam-e-bahaar aaya
magar na is dil-e-be-sabr ko qarar aaya
kahin jawab na tu ne diya yahan ke siwa
jahan mein yun to bahut main tujhe pukar aaya
sara-e-dahr mein chhoDa tan-e-kasif apna
ye bojh sar se musafir tera utar aaya
hamare nala-e-dil ka na puchhiye ahwal
gali se yar ki himmat bhi ab ke haar aaya
paDi jo qais ke upar nazar bayaban mein
mujhe gharib ke upar ghazab ka pyar aaya
na apne panw se aana mila gali mein teri
yahan bhi chaar ke kandhon pe main sawar aaya
ye iztirab hai kyun hai kidhar ka qasd ai ruh
kahan se aai talab kis jagah se tar aaya
bura KHizan ka ho dekhe jo sukhe sukhe honT
gharib phul pe mujh ko ghazab ka pyar aaya
meri na puchh ki teri gali mein KHak hun main
tujhi ko meri wafa ka na e'tibar aaya
lahad ne khol ke aaghosh di jagah jo mujhe
lipaT ke rah gae hum ko bhi KHub pyar aaya
yaqin jaan le saqi ki KHum ki KHair nahin
KHuda na karda jo ab ke mujhe KHumar aaya
mere nasib kahan is tarah ke dida-e-tar
sunun ye KHush-KHabari kan se ki yar aaya
nigah ne un ki jahan said-e-nau ko tak liya
ada ne un ki kaha le naya shikar aaya
tere firaq ke KHugar na mar miTe jab tak
qaza ke aane ka tab tak na e'tibar aaya
dila palaT gaya qismat ka pahle hi pasa
ab apni jit kahan dil jab apna haar aaya
jab iKHtiyar chaman par nahin to hum ko kya
hazar bar agar mausam-e-bahaar aaya
shikayat-e-dil-e-muztar kahan talak ai maut
duaen dunga tujhe gar ise qarar aaya
jawab-e-KHat ka na qasid se majra puchho
hai saf chehre se zahir ki sharmsar aaya
nazar mein phir gai chaal aap ki jawani ki
jo laDkhaData hua koi baada-KHwar aaya
jo mangte to hamein baghban se kya milta
gharib phul to daman ko bhi pasar aaya
na apne nala-e-dil ko mila jawab kahin
nikal ke dil se tujhe arsh tak pukar aaya
adam mein 'shad' ko kya walwala ho jannat ka
ki ye gharib to hasti se dil ko mar aaya
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.