siyane the magar itne nahin hum

siyāne the magar itne nahīñ ham

ḳhamoshī kī zabāñ samjhe nahīñ ham

anā kī baat ab sunñā paḌegī

vo kyā sochegā jo rūThe nahīñ ham

adhūrī lag rahī hai jiit us ko

use haare hue lagte nahīñ ham

hameñ to rok lo uThne se pahle

palaT kar dekhne vaale nahīñ ham

bichhaḌne kā tire sadma to hogā

magar is ḳhauf ko jiite nahīñ ham

tire rahte to kyā hote kisī ke

tujhe kho kar bhī duniyā ke nahīñ ham

ye manzil ḳhvāb hī rahtī hamesha

agar ghar lauT kar aate nahīñ ham

kabhī soche to is pahlū se koī

kisī kī baat kyuuñ sunte nahīñ ham

abhī tak mashvaroñ par jī rahe haiñ

kisī sūrat baḌe hote nahīñ ham

siyane the magar itne nahin hum

KHamoshi ki zaban samjhe nahin hum

ana ki baat ab sunna paDegi

wo kya sochega jo ruThe nahin hum

adhuri lag rahi hai jit us ko

use haare hue lagte nahin hum

hamein to rok lo uThne se pahle

palaT kar dekhne wale nahin hum

bichhaDne ka tere sadma to hoga

magar is KHauf ko jite nahin hum

tere rahte to kya hote kisi ke

tujhe kho kar bhi duniya ke nahin hum

ye manzil KHwab hi rahti hamesha

agar ghar lauT kar aate nahin hum

kabhi soche to is pahlu se koi

kisi ki baat kyun sunte nahin hum

abhi tak mashwaron par ji rahe hain

kisi surat baDe hote nahin hum