so ab tabir ki dhun hai ki dekhe ja chuke hain

so ab ta.abīr kī dhun hai ki dekhe jā chuke haiñ

vagarna ḳhvāb-e-nā-mumkin se aage jā chuke haiñ

hamāre zimme hai ā.indagāñ kī maut kā dukh

aur un kā ġham jo ham logoñ se pahle jā chuke haiñ

bahut se log ab bad-zan haiñ gaañv ke ḳhudā se

bahut se log shahroñ meñ kamāne jā chuke haiñ

ham ā.inda zamānoñ kī ġhazal tartīb deñge

tumhārī be-ruḳhī par sher likkhe jā chuke haiñ

mire bhaa.ī maiñ kahtā thā ki āvāzoñ se mat Dar

tū jin ke Dar se chup baiThā thā sun le jā chuke haiñ

so ab tabir ki dhun hai ki dekhe ja chuke hain

wagarna KHwab-e-na-mumkin se aage ja chuke hain

hamare zimme hai aaindagan ki maut ka dukh

aur un ka gham jo hum logon se pahle ja chuke hain

bahut se log ab bad-zan hain ganw ke KHuda se

bahut se log shahron mein kamane ja chuke hain

hum aainda zamanon ki ghazal tartib denge

tumhaari be-ruKHi par sher likkhe ja chuke hain

mere bhai main kahta tha ki aawazon se mat Dar

tu jin ke Dar se chup baiTha tha sun le ja chuke hain