soch lije kyon azab aaya tha qaum-e-hud par

soch liije kyoñ 'azāb aayā thā qaum-e-hūd par

aur phir kuchh ġhaur kiije lamha-e-maujūd par

sau tarah kī ḳhvāhisheñ peshāniyoñ par darj haiñ

lag rahā hai sājidoñ kā qarz hai masjūd par

roz-e-avval se jahāñ meñ do tarah kā hai yaqīñ

ek ibrāhīm par aur dūsrā namrūd par

sūra-e-iḳhlās kī tasvīr hai gar īshvar

merā bhī īqān hai phir aap ke mā'būd par

raat phir merī ḳhudā se fajr tak gap-shap huī

raat phir hañste rahe ham donoñ hast-o-būd par

shaam ko phir yaad aa.ī shaam ke bāzār kī

phir kiyā maiñ ne tabarrā shaam ke mardūd par

yaad aa jaatī haiñ ab bhī kūḌā-karkaT dekh kar

bhinbhinātī makkhiyāñ ik tifl-e-nau-maulūd par

ho sake to dahr kā naqsha uThā kar dekhiye

kis qadar mahdūd haiñ ham arz-e-lā-mahdūd par

tiin chauthā.ī sadī se chal rahe haiñ qāfile

hijratī pahuñche nahīñ haiñ manzil-e-maqsūd par

sirf itnā hī kahūñgā maiñ sipah-sālār se

aap cigarette pī rahe haiñ baiTh kar bārūd par

baap huuñ so ek hī masraf hai merī ziist kā

ḳharch honā hai mujhe aulād kī bahbūd par

dostoñ kī qadr 'vāsif' pūchhiye us shaḳhs se

vaqt paḌne par liyā ho qarz jis ne suud par

soch lije kyon 'azab aaya tha qaum-e-hud par

aur phir kuchh ghaur kije lamha-e-maujud par

sau tarah ki KHwahishen peshaniyon par darj hain

lag raha hai sajidon ka qarz hai masjud par

roz-e-awwal se jahan mein do tarah ka hai yaqin

ek ibrahim par aur dusra namrud par

sura-e-iKHlas ki taswir hai gar ishwar

mera bhi iqan hai phir aap ke ma'bud par

raat phir meri KHuda se fajr tak gap-shap hui

raat phir hanste rahe hum donon hast-o-bud par

sham ko phir yaad aai sham ke bazar ki

phir kiya main ne tabarra sham ke mardud par

yaad aa jati hain ab bhi kuDa-karkaT dekh kar

bhinbhinati makkhiyan ek tifl-e-nau-maulud par

ho sake to dahr ka naqsha uTha kar dekhiye

kis qadar mahdud hain hum arz-e-la-mahdud par

tin chauthai sadi se chal rahe hain qafile

hijrati pahunche nahin hain manzil-e-maqsud par

sirf itna hi kahunga main sipah-salar se

aap cigarette pi rahe hain baiTh kar barud par

bap hun so ek hi masraf hai meri zist ka

KHarch hona hai mujhe aulad ki bahbud par

doston ki qadr 'wasif' puchhiye us shaKHs se

waqt paDne par liya ho qarz jis ne sud par