socha kabhi nahin tha ki aisa karenge KHwab

sochā kabhī nahīñ thā ki aisā kareñge ḳhvāb

āñkhoñ se merī niiñd kā saudā kareñge ḳhvāb

hai TūTnā nasīb to TuuTā kareñge ḳhvāb

ham to har ek haal meñ dekhā kareñge ḳhvāb

dekho zarūr ḳhvāhish-e-tā’bīr mat karo

halkān tum ko aur ziyāda kareñge ḳhvāb

dil ko bahut 'azīz hai ye kārobār-e-shauq

ham to hamesha bechā ḳharīdā kareñge ḳhvāb

ye soch kar hī maiñ ne lagā.e haiñ ye daraḳht

phal deñ na deñ pa dhuup meñ saaya kareñge ḳhvāb

jin ko hai ḳhvāb dekhne kī lat lagī huī

āñkheñ khulī bhī hoñ to vo dekhā kareñge ḳhvāb

āñkhoñ meñ ḳhāmushī se basāyā to thā magar

sochā na thā ki shor machāyā kareñge ḳhvāb

aa.egī gahrī niiñd 'kamāl' aap ko tabhī

jab aap apnī āñkhoñ se minhā kareñge ḳhvāb

socha kabhi nahin tha ki aisa karenge KHwab

aankhon se meri nind ka sauda karenge KHwab

hai TuTna nasib to TuTa karenge KHwab

hum to har ek haal mein dekha karenge KHwab

dekho zarur KHwahish-e-ta’bir mat karo

halkan tum ko aur ziyaada karenge KHwab

dil ko bahut 'aziz hai ye karobar-e-shauq

hum to hamesha becha KHarida karenge KHwab

ye soch kar hi main ne lagae hain ye daraKHt

phal den na den pa dhup mein saya karenge KHwab

jin ko hai KHwab dekhne ki lat lagi hui

aankhen khuli bhi hon to wo dekha karenge KHwab

aankhon mein KHamushi se basaya to tha magar

socha na tha ki shor machaya karenge KHwab

aaegi gahri nind 'kamal' aap ko tabhi

jab aap apni aankhon se minha karenge KHwab