سوچا تھا عشق ہوگا نہیں اک پری کے بعد

سوچا تھا عشق ہوگا نہیں اک پری کے بعد

پر پیاس اور بڑھ گئی ہے اس ندی کے بعد

ناکام ہو جو عشق میں تو شاعری کرو

جادوگری سے کام لو چارہ گری کے بعد

تب کیا کرے گا دوست اگر وہ نہیں ملی

جو زندگی تو چاہتا ہے خودکشی کے بعد

پھر بھی یقین کر رہا ہوں اس خدا پہ میں

جو بے بسی بنا رہا ہے آدمی کے بعد

کچھ زخم مسکراہٹوں کے ایسے رہ گئے

جیسے کہ تیرگی کے نشاں چاندنی کے بعد

یہ دل جلوں کی فوج مرے ساتھ جائے گی

کچھ بھی نہیں بچے گا یہاں شاعری کے بعد

ہم عشق سے نکل چکے افسردگی میں ہیں

اک اجنبی کے ساتھ ہیں اک اجنبی کے بعد