socha tha ishq hoga nahin ek pari ke baad

sochā thā ishq hogā nahīñ ik parī ke baa'd

par pyaas aur baḌh ga.ī hai us nadī ke baa'd

nākām ho jo ishq meñ to shā.erī karo

jādūgarī se kaam lo chāragarī ke baa'd

tab kyā karegā dost agar vo nahīñ milī

jo zindagī tū chāhtā hai ḳhud-kushī ke baa'd

phir bhī yaqīn kar rahā huuñ us ḳhudā pe maiñ

jo bebasī banā rahā hai aadmī ke baa'd

kuchh zaḳhm muskurāhaToñ ke aise rah ga.e

jaise ki tīrgī ke nishāñ chāñdnī ke baa'd

ye dil-jaloñ kī fauj mire saath jā.egī

kuchh bhī nahīñ bachegā yahāñ shā.erī ke baa'd

ham ishq se nikal chuke afsurdagī meñ haiñ

ik ajnabī ke saath haiñ ik ajnabī ke baa'd

socha tha ishq hoga nahin ek pari ke ba'd

par pyas aur baDh gai hai us nadi ke ba'd

nakaam ho jo ishq mein to shaeri karo

jadugari se kaam lo chaaragari ke ba'd

tab kya karega dost agar wo nahin mili

jo zindagi tu chahta hai KHud-kushi ke ba'd

phir bhi yaqin kar raha hun us KHuda pe main

jo bebasi bana raha hai aadmi ke ba'd

kuchh zaKHm muskurahaTon ke aise rah gae

jaise ki tirgi ke nishan chandni ke ba'd

ye dil-jalon ki fauj mere sath jaegi

kuchh bhi nahin bachega yahan shaeri ke ba'd

hum ishq se nikal chuke afsurdagi mein hain

ek ajnabi ke sath hain ek ajnabi ke ba'd