socha tha tumne dirham-o-dinar denge log

sochā thā tum ne dirham-o-dīnār deñge log

sar kaaT deñge phir tumheñ dastār deñge log

iflās-o-tañg-dastī kā e.ajāz ye bhī hai

māñgoge gar qalam tumheñ hathiyār deñge log

pahle-pahal to vasl kī lazzat milegī aur

phir umr bhar ko hijr kā āzār deñge log

mujrim rihā hue haiñ to ma.asūm qaid haiñ

kis ko ḳhabar thī aisī bhī sarkār deñge log

sach bolnā hai jurm ye taslīm hai magar

ik jurm kī sazā mujhe sau baar deñge log

bolūñ agar maiñ jhuuT to mar jā.egā zamīr

kah duuñ agar maiñ sach to mujhe maar deñge log

maiñ hī karūñgā shahr kī miTTī ko suraḳh-rū

mere hī ḳhuuñ se chhāp ke aḳhbār deñge log

socha tha tum ne dirham-o-dinar denge log

sar kaT denge phir tumhein dastar denge log

iflas-o-tang-dasti ka eajaz ye bhi hai

mangoge gar qalam tumhein hathiyar denge log

pahle-pahal to wasl ki lazzat milegi aur

phir umr bhar ko hijr ka aazar denge log

mujrim riha hue hain to masum qaid hain

kis ko KHabar thi aisi bhi sarkar denge log

sach bolna hai jurm ye taslim hai magar

ek jurm ki saza mujhe sau bar denge log

bolun agar main jhuT to mar jaega zamir

kah dun agar main sach to mujhe mar denge log

main hi karunga shahr ki miTTi ko suraKH-ru

mere hi KHun se chhap ke aKHbar denge log