sochna chhoD diya humne ki kal kya hoga

sochnā chhoḌ diyā ham ne ki kal kyā hogā

is se behtar ġham-e-daurāñ tirā hal kyā hogā

tum mujhe shahr-badar kar to rahe ho lekin

ye bhī sochā hai ki anjām-e-ġhazal kyā hogā

maiñ to kar luuñ ba-ḳhushī tujh ko gavāra lekin

ġham-e-tanhā.ī tirā dard-e-amal kyā hogā

jis kī ḳhushbū se mahakte haiñ dar-o-bām-e-hayāt

kuchh sahī mausam-e-gul is kā badal kyā hogā

jagmagātā hai jo har zarre ke dil meñ aksar

haa.e vo husn-e-sanam husn-e-azal kyā hogā

ḳhud masīhā hai yahāñ āh-o-fuġhāñ meñ masrūf

is se auroñ kī takālīf kā hal kyā hogā

gesū-e-vaqt ulajhte hī chale jaate haiñ

har bashar soch meñ Duubā hai ki kal kyā hogā

ai mere bhūlne vaale kabhī ye bhī sochā

jagmagā uTThe jo yādoñ ke kañval kyā hogā

har-nafas daar kī mānind lage hai 'aḳhtar'

zindagī ye hai to phir rang-e-ajal kyā hogā

sochna chhoD diya hum ne ki kal kya hoga

is se behtar gham-e-dauran tera hal kya hoga

tum mujhe shahr-badar kar to rahe ho lekin

ye bhi socha hai ki anjam-e-ghazal kya hoga

main to kar lun ba-KHushi tujh ko gawara lekin

gham-e-tanhai tera dard-e-amal kya hoga

jis ki KHushbu se mahakte hain dar-o-baam-e-hayat

kuchh sahi mausam-e-gul is ka badal kya hoga

jagmagata hai jo har zarre ke dil mein aksar

hae wo husn-e-sanam husn-e-azal kya hoga

KHud masiha hai yahan aah-o-fughan mein masruf

is se auron ki takalif ka hal kya hoga

gesu-e-waqt ulajhte hi chale jate hain

har bashar soch mein Duba hai ki kal kya hoga

ai mere bhulne wale kabhi ye bhi socha

jagmaga uTThe jo yaadon ke kanwal kya hoga

har-nafas dar ki manind lage hai 'aKHtar'

zindagi ye hai to phir rang-e-ajal kya hoga