sochon ke hathon ka gahna TuT gaya

sochoñ ke hāthoñ kā gahnā TuuT gayā

lafzoñ se lafzoñ kā rishta TuuT gayā

vaqt ne nīndeñ chhīn liiñ merī āñkhoñ se

tū thā jis kī jaan vo sapnā TuuT gayā

us ne bas ik phuul chaman meñ toḌā thā

mere andar jaane kyā kyā TuuT gayā

ab ke gaañv meñ jaanā chāhā thā lekin

aisī huī barsāt ki rasta TuuT gayā

vaqt se lohā lenā āsāñ kaam na thā

is koshish meñ haath hamārā TuuT gayā

ham ḳhud us se tark-e-ta.alluq kar baiThe

jhūTā sachchā har ik va.ada TuuT gayā

kyā batlā.ūñ kaun sā thā bāzār 'ḳhalish'

jis meñ mere dil kā jhumkā TuuT gayā

sochon ke hathon ka gahna TuT gaya

lafzon se lafzon ka rishta TuT gaya

waqt ne ninden chhin lin meri aankhon se

tu tha jis ki jaan wo sapna TuT gaya

us ne bas ek phul chaman mein toDa tha

mere andar jaane kya kya TuT gaya

ab ke ganw mein jaana chaha tha lekin

aisi hui barsat ki rasta TuT gaya

waqt se loha lena aasan kaam na tha

is koshish mein hath hamara TuT gaya

hum KHud us se tark-e-talluq kar baiThe

jhuTa sachcha har ek wada TuT gaya

kya batlaun kaun sa tha bazar 'KHalish'

jis mein mere dil ka jhumka TuT gaya