sochta hun kabhi huron ka KHayal achchha hai

sochtā huuñ kabhī hūroñ kā ḳhayāl achchhā hai

kabhī kahtā huuñ ki us but kā jamāl achchhā hai

mujh se kahte haiñ kaho 'ishq meñ haal achchhā hai

chheḌ achchhī hai ye andāz-e-savāl achchhā hai

na adā.eñ tirī achchhī na jamāl achchhā hai

asl meñ chāhne vaale kā ḳhayāl achchhā hai

dekh kar shakl vo ā.īne meñ apnī bole

kaun kahtā hai ki hūroñ kā jamāl achchhā hai

jo hunar kaam na aa.e to hunar phir kaisā

kaam jo vaqt par aa.e vo kamāl achchhā hai

vo javānī vo adā aur vo qadd-e-mauzūñ

dekh kar bol uThā dil bhī ki maal achchhā hai

hijr meñ dil ne kahā kūcha-e-jānāñ meñ chalo

shauq kam-baḳht ye bolā ki ḳhayāl achchhā hai

yuuñ to 'āshiq ke liye donoñ vabāl-e-jāñ haiñ

hijr se phir bhī har ik tarah visāl achchhā hai

aap jab hote nahīñ is kā to phir zikr hī kyā

aap jab sāmne baiThe haiñ to haal achchhā hai

jalva-afroz hoñ jab aap nazar ke aage

vo mahīna vo ghaḌī aur vo saal achchhā hai

us ne jab pyaar se pūchhā ki kaho kaise ho

muñh se be-sāḳhta ye niklā ki haal achchhā hai

lutf se ḳhālī nahīñ jaur bhī un kā 'hājir'

jo hasīnoñ se milā hai vo malāl achchhā hai

sochta hun kabhi huron ka KHayal achchha hai

kabhi kahta hun ki us but ka jamal achchha hai

mujh se kahte hain kaho 'ishq mein haal achchha hai

chheD achchhi hai ye andaz-e-sawal achchha hai

na adaen teri achchhi na jamal achchha hai

asl mein chahne wale ka KHayal achchha hai

dekh kar shakl wo aaine mein apni bole

kaun kahta hai ki huron ka jamal achchha hai

jo hunar kaam na aae to hunar phir kaisa

kaam jo waqt par aae wo kamal achchha hai

wo jawani wo ada aur wo qadd-e-mauzun

dekh kar bol uTha dil bhi ki mal achchha hai

hijr mein dil ne kaha kucha-e-jaanan mein chalo

shauq kam-baKHt ye bola ki KHayal achchha hai

yun to 'ashiq ke liye donon wabaal-e-jaan hain

hijr se phir bhi har ek tarah visal achchha hai

aap jab hote nahin is ka to phir zikr hi kya

aap jab samne baiThe hain to haal achchha hai

jalwa-afroz hon jab aap nazar ke aage

wo mahina wo ghaDi aur wo sal achchha hai

us ne jab pyar se puchha ki kaho kaise ho

munh se be-saKHta ye nikla ki haal achchha hai

lutf se KHali nahin jaur bhi un ka 'hajir'

jo hasinon se mila hai wo malal achchha hai