سوچتے ہیں یہ کہاں پیار نبھانے والے

سوچتے ہیں یہ کہاں پیار نبھانے والے

کیسی کیسی یہ سزا دیں گے زمانے والے

چاند سے کہہ دو کہ غش کھا کے وہ گر جائے گا

مجھ سے ملنے وہ ابھی چھت پہ ہیں آنے والے

کیا گزرتی ہے ترے آ کے چلے جانے سے

یہ بھی سوچ اے مرے ارمان جگانے والے

شام تپتی ہے بس اک تیرے نہیں آنے سے

یہ بھی سوچا ہے کبھی کہہ کے نہ آنے والے

مٹ گیا ہوتا میں کب کا مری دشمن دنیا

ہاتھ لمبے ہیں بہت تیرے بچانے والے

وہ نجومی وہی شاعر وہی فن کار بھی ہے

سیفؔ ہم کیا ہیں فقط درد سنانے والے