sochti hun mujhse bhi aisa bayan ho jaega

sochtī huuñ mujh se bhī aisā bayāñ ho jā.egā

jo ki mere dard kā bhī tarjumāñ ho jā.egā

ḳhvāb ho kar rah ga.ī haiñ kaisī kaisī sūrateñ

mujh ko lagtā hai ki sab vahm-o-gumāñ ho jā.egā

maiñ ne sochā bhī na thā utnā badal jā.egā vo

is qadar tabdīl rang-e-āsmāñ ho jā.egā

us ko fursat hī kahāñ thī apnī bātoñ se magar

maiñ ye samjhī thī vo merā ham-zabāñ ho jā.egā

haath meñ ḳhanjar hai us ke aur mire siine meñ dil

aaj phir ham donoñ kā hī imtihāñ ho jā.egā

sochtī huuñ us ko dil kā haal to kah duuñ magar

aisī bātoñ se vo kāfir bad-gumāñ ho jā.egā

phir anal-haq kī sadā gūñjegī maqtal meñ kahīñ

vāqi.a vo phir sar-e-nok-e-sināñ ho jā.egā

māvarā ho jā.ūñgī 'zahrā' maiñ apnī zaat se

ek din merā makāñ bhī lā-makāñ ho jā.egā

sochti hun mujh se bhi aisa bayan ho jaega

jo ki mere dard ka bhi tarjuman ho jaega

KHwab ho kar rah gai hain kaisi kaisi suraten

mujh ko lagta hai ki sab wahm-o-guman ho jaega

main ne socha bhi na tha utna badal jaega wo

is qadar tabdil rang-e-asman ho jaega

us ko fursat hi kahan thi apni baaton se magar

main ye samjhi thi wo mera ham-zaban ho jaega

hath mein KHanjar hai us ke aur mere sine mein dil

aaj phir hum donon ka hi imtihan ho jaega

sochti hun us ko dil ka haal to kah dun magar

aisi baaton se wo kafir bad-guman ho jaega

phir anal-haq ki sada gunjegi maqtal mein kahin

waqia wo phir sar-e-nok-e-sinan ho jaega

mawara ho jaungi 'zahra' main apni zat se

ek din mera makan bhi la-makan ho jaega