soe armanon ko jagaya kis ki husn-arai ne

so.e armānoñ ko jagāyā kis kī husn-ārā.ī ne

kis ke partav se raushan haiñ dil ke dhuñdle ā.īne

mahfil mahfil kyoñ na tumhāre tīr-e-nazar kā charchā ho

kitnī duā.eñ diiñ haiñ dil ke zaḳhmoñ kī gahrā.ī ne

maiñ jis jānib bhī muḌtā huuñ un ko sāmne paatā huuñ

saare parde toḌ diye haiñ is dil kī bīnā.ī ne

dil ke sahrā se phir guzrā qāfila un kī yādoñ kā

kaise kaise jashn manā.e aaj mirī tanhā.ī ne

nādānī meñ Duub mare jo un kā rañj bhalā kis ko

lekin jin ko qatl kiyā hai ḳhud apnī dānā.ī ne

kuchh to 'na.īm' is gulshan kī ab ahl-e-zabāñ bhī fikr kareñ

jis ko sañvārā 'mīr'-o-'anīs'-o-'ġhālib' aur 'mīnā.ī' ne

soe armanon ko jagaya kis ki husn-arai ne

kis ke partaw se raushan hain dil ke dhundle aaine

mahfil mahfil kyon na tumhaare tir-e-nazar ka charcha ho

kitni duaen din hain dil ke zaKHmon ki gahrai ne

main jis jaanib bhi muDta hun un ko samne pata hun

sare parde toD diye hain is dil ki binai ne

dil ke sahra se phir guzra qafila un ki yaadon ka

kaise kaise jashn manae aaj meri tanhai ne

nadani mein Dub mare jo un ka ranj bhala kis ko

lekin jin ko qatl kiya hai KHud apni danai ne

kuchh to 'naim' is gulshan ki ab ahl-e-zaban bhi fikr karen

jis ko sanwara 'mir'-o-'anis'-o-'ghaalib' aur 'minai' ne