soe huon mein KHwab se bedar kaun hai

so.e huoñ meñ ḳhvāb se bedār kaun hai

is ālam-e-ḳhayāl meñ hushiyār kaun hai

mat pūchh us kā tālib-e-dīdār kaun hai

ye dekh mohr-bar-lab-e-guftār kaun hai

utrā hai chāñd siine meñ yā ḳhud hī jal uThe

tārīkiyoñ meñ dil kī ziyā-bār kaun hai

arz-e-hunar meñ koh-e-vafā par ho tesha-zan

de jaan nazr-e-sho.ala-e-izhār kaun hai

jo fan-tarāziyāñ qad-o-gesū kī bhāñp le

jo jāñch le qayāmat-e-raftār kaun hai

sab apne apne dār-o-rasan saath le chalo

pūchheñge vo ki tum meñ vafādār kaun hai

kuchh log apne ḳhuuñ meñ nahā kar chale ga.e

ab surḳh-rū-e-arsa-e-paikār kaun hai

do-gām dil kī raah pe chalnā muhāl hai

ab aur aisī vādī-e-pur-ḳhār kaun hai

patthar se aag aag se jo laa.e jū-e-shīr

tum meñ vo tesha-dār-e-fusūñ-kār kaun hai

shāyad koī paTaktā hai sar chal ke dekhiye

'bāqar' hai qais hai pas-e-dīvār kaun hai

soe huon mein KHwab se bedar kaun hai

is aalam-e-KHayal mein hushiyar kaun hai

mat puchh us ka talib-e-didar kaun hai

ye dekh mohr-bar-lab-e-guftar kaun hai

utra hai chand sine mein ya KHud hi jal uThe

tarikiyon mein dil ki ziya-bar kaun hai

arz-e-hunar mein koh-e-wafa par ho tesha-zan

de jaan nazr-e-shoala-e-izhaar kaun hai

jo fan-taraaziyan qad-o-gesu ki bhanp le

jo jaanch le qayamat-e-raftar kaun hai

sab apne apne dar-o-rasan sath le chalo

puchhenge wo ki tum mein wafadar kaun hai

kuchh log apne KHun mein naha kar chale gae

ab surKH-ru-e-arsa-e-paikar kaun hai

do-gam dil ki rah pe chalna muhaal hai

ab aur aisi wadi-e-pur-KHar kaun hai

patthar se aag aag se jo lae ju-e-shir

tum mein wo tesha-dar-e-fusun-kar kaun hai

shayad koi paTakta hai sar chal ke dekhiye

'baqar' hai qais hai pas-e-diwar kaun hai