sote sote chaunk paDe hum KHwab mein humne kya dekha

sote sote chauñk paḌe ham ḳhvāb meñ ham ne kyā dekhā

jo ḳhud ham ko DhūñD rahā ho aisā ik rastā dekhā

duur se ik parchhā.īñ dekhī apne se miltī-jultī

paas se apne chehre meñ bhī aur koī chehra dekhā

sonā lene jab nikle to har har Dher meñ miTTī thī

jab miTTī kī khoj meñ nikle sonā hī sonā dekhā

sūkhī dhartī sun letī hai paanī kī āvāzoñ ko

pyāsī āñkheñ bol uThtī haiñ ham ne ik dariyā dekhā

aaj hameñ ḳhud apne ashkoñ kī qīmat ma.alūm huī

apnī chitā meñ apne-āp ko jab ham ne jaltā dekhā

chāñdī ke se jin ke badan the sūraj ke se mukhḌe the

kuchh andhī galiyoñ meñ ham ne un kā bhī saaya dekhā

raat vahī phir baat huī nā ham ko niiñd nahīñ aa.ī

apnī ruuh ke sannāTe se shor sā ik uThtā dekhā

sote sote chaunk paDe hum KHwab mein hum ne kya dekha

jo KHud hum ko DhunD raha ho aisa ek rasta dekha

dur se ek parchhain dekhi apne se milti-julti

pas se apne chehre mein bhi aur koi chehra dekha

sona lene jab nikle to har har Dher mein miTTi thi

jab miTTi ki khoj mein nikle sona hi sona dekha

sukhi dharti sun leti hai pani ki aawazon ko

pyasi aankhen bol uThti hain hum ne ek dariya dekha

aaj hamein KHud apne ashkon ki qimat malum hui

apni chita mein apne-ap ko jab hum ne jalta dekha

chandi ke se jin ke badan the suraj ke se mukhDe the

kuchh andhi galiyon mein hum ne un ka bhi saya dekha

raat wahi phir baat hui na hum ko nind nahin aai

apni ruh ke sannaTe se shor sa ek uThta dekha