soz-e-darun ne rah ko aasan bana diya

soz-e-darūñ ne raah ko āsāñ banā diyā

jab aag meñ gire to gulistāñ banā diyā

kuchh log apnī rau meñ sahar-ḳhez ho ga.e

ḳhush-posh ne harīs-e-garebāñ banā diyā

is ko adā-e-husn ki husn-e-adā kahūñ

us shoḳh ne sitam ko bhī ehsāñ banā diyā

sākin thī mauj zulf ke bahr-e-siyāh meñ

bād-e-sabā ne chheḌ ke tūfāñ banā diyā

duniyā-e-tañg-dil ne mohabbat ke ās-pās

dīvār vo uThā.ī ki zindāñ banā diyā

dil kī kalī khilā dī ġham-e-tāza-kār ne

mauj-e-nafas ko bād-e-bahārāñ banā diyā

ai rahrav-e-tajassus-e-hal ḳhatm hai safar

dushvāriyoñ ko vaqt ne āsāñ banā diyā

dīvāngī-e-ishq kā 'mānī' pe hai karam

āvāra-gard-e-kū-e-nigārāñ banā diyā

soz-e-darun ne rah ko aasan bana diya

jab aag mein gire to gulistan bana diya

kuchh log apni rau mein sahar-KHez ho gae

KHush-posh ne haris-e-gareban bana diya

is ko ada-e-husn ki husn-e-ada kahun

us shoKH ne sitam ko bhi ehsan bana diya

sakin thi mauj zulf ke bahr-e-siyah mein

baad-e-saba ne chheD ke tufan bana diya

duniya-e-tang-dil ne mohabbat ke aas-pas

diwar wo uThai ki zindan bana diya

dil ki kali khila di gham-e-taza-kar ne

mauj-e-nafas ko baad-e-bahaaran bana diya

ai rahraw-e-tajassus-e-hal KHatm hai safar

dushwariyon ko waqt ne aasan bana diya

diwangi-e-ishq ka 'mani' pe hai karam

aawara-gard-e-ku-e-nigaran bana diya