soz-e-dil ka zikr apne munh pe jab late hain hum

soz-e-dil kā zikr apne muñh pe jab laate haiñ ham

sham.a saañ apnī zabāñ se aap jal jaate haiñ ham

dam-ba-dam us shoḳh ke āzurda ho jaane se aah

jab nahīñ kuchh apnā bas chaltā to ghabrāte haiñ ham

baiThne ko to nahīñ aa.e haiñ yaañ ai bāġhbāñ

kyuuñ ḳhafā hotā hai itnā ham se tū jaate haiñ ham

dil se ham chhuT jaa.eñ yā dil ham se chhuT jaave kahīñ

is ke aljheḌe se ab to saḳht uktāte haiñ ham

dil ḳhudā jaane kidhar gum ho gayā ai dostāñ

DhūñDhte phirte haiñ kab se aur nahīñ paate haiñ ham

donoñ dīvāne haiñ kyā samjheñge aapas meñ abas

ham ko samjhātā hai dil aur dil ko samjhāte haiñ ham

yaad meñ us gul-badan kī āj-kal tū ai 'hasan'

baaġh meñ phir phir ke apne dil ko bahlāte haiñ ham

soz-e-dil ka zikr apne munh pe jab late hain hum

shama san apni zaban se aap jal jate hain hum

dam-ba-dam us shoKH ke aazurda ho jaane se aah

jab nahin kuchh apna bas chalta to ghabraate hain hum

baiThne ko to nahin aae hain yan ai baghban

kyun KHafa hota hai itna hum se tu jate hain hum

dil se hum chhuT jaen ya dil hum se chhuT jawe kahin

is ke aljheDe se ab to saKHt uktate hain hum

dil KHuda jaane kidhar gum ho gaya ai dostan

DhunDhte phirte hain kab se aur nahin pate hain hum

donon diwane hain kya samjhenge aapas mein abas

hum ko samjhata hai dil aur dil ko samjhate hain hum

yaad mein us gul-badan ki aaj-kal tu ai 'hasan'

bagh mein phir phir ke apne dil ko bahlate hain hum